Psychotherapie

Wéini kann eng psychotherapeutesch Behandlung hëllefräich sinn?

Psychotherapeutesch Consultatioune kënnen a schwierege Liewenssituatiounen hëllefräich sinn. Esou Liewenskrise kënnen Äert séilescht Wuelergoen, Äert Selbstwäertgefill, Är Bezéiungen an Ären Alldag beanträchtegen. Si entstinn z.B. duerch Verloschter an Trauer, Verännerungen a wichtege Liewensberäicher, schwéier Entscheedungen déi ustinn, Adaptatioun un eng néi Kultur, chronesch an/oder schwéier Krankheeten.

 

Bei länger undauernde psychesche Problemer, déi Ären Alldag, Är Leeschtungsfäegkeet an/oder Är Relatioune staark beanträchtegen, kann och eng Psychotherapie hëllefräich sinn. Beispiller fir méi laang undauernd psychesch Problemer sinn:

 

  • Depressioun a Burnout
  • Iessstéierungen: Bulimie, Anorexie, Binge Eating…
  • Angschtstéierungen: Panikattacken, Phobien…
  • Zwangsstéierungen: Zwangsgedanken an Zwangshandlungen
  • Posttraumatesch Belaaschtungsstéierungen
  • Emotional Instabilitéit, Stresstoleranzproblemer
  • Impulsiivt an sech selwer schiedegend Verhalen
  • Perséinlechkeetsstéierungen
  • Schlofstéierungen
  • Psychosomatesch Stéierungen: wann bei kierperleche Wéier a Problemer net genuch organesch Ursaache fonnt ginn
  • Substanzmëssbrauch a Suchtverhalen

Wéi schaffen ech?

A menger Aarbecht si fir mech Empathie, Mënschlechkeet, Wäertschätzung an Authentizitéit selbstverständlech.

 

Ech sinn Diplom-Psychologin a vum Ministère de la Santé unerkannte Psychotherapeutin. Spezialiséiert sinn ech an der kognitiver Verhalenstherapie/ thérapie cognitivo-comportementale. An der Verhalenstherapie ginn duerch Studien als wierksam beluechten Interventiounen agesat, fir psychescht Leiden ze reduzéieren an ze heelen. A menger Aarbecht passen ech de Choix vun den Therapiemethoden un Är Bedierfnesser an Är Liewenssituatioun un. Nieft de klasseschen Interventiounen aus der Verhalenstherapie schaffen ech och vill mat Elementer aus der sougenannte „drëtter Well“ vun der moderner Verhalenstherapie, d.h. mat Achtsamkeetsbaséierten Therapieusätz wéi d‘Acceptance and Commitment Therapy (ACT) an d‘Dialectical Behavioral Therapy (DBT).  Ech schaffe mat Erwuessenen a grousse Jugendlecher (15+).